شفرات نفسية

(1)
ساعة تكون مليانة بجنون
واللى يكون ..
زى مايكون
حلم وعاوز ليه كام يوم؟
ميهمش
بس الساعة دية تدوم
كله بيعمل تحت اديها
عايز يلقى نتيجة فيها
وتفاؤل للى بعديها
ساعة حظ من غير شوم

(2)
رقصة مريم
رقصة سامر
رقصة ناتالى
رقصة نادر
نفس الرقصة...
نفس الفلفصة جوة الشبكة
نفس النهجان
نفس الخوف
نفس الاحزان
نفس الحركة
واللى بيتفرج :
نفس العين وفيها الشهقة
لكن مش نفس الازمان,
حاجات بسيطة هى الفارقة

(3)
نفس السؤال
عن شيئ عمره مانقال
او ممكن انقال...
هناك بعيد فوق الجبال
وبلغة تانية
ولجنس تانى
وف كون تانى
لكن بنفس الحال
جوّاه تركة هموم
سؤالات تغطس تعوم
من معنى كلمة اتقال..

(4)
إستحضار الارواح
الكشف عن غير المباح
لعبة جنون..
لكن ف قلبى ليها ارتياح
يمكن لضعفى وكونى انسى؟
كائن احادى وياما نفسى؟
وطرق كتير خليتنى امشى,
ف مكان غلط
واختار غلط
وحاجات كتير قتلت ارادتى؟
يمكن كده ينشد عودى
ويقوى صفى؟؟
اكيد

(5)
سؤال وجواب
وراحة اجابة..
ونوم كسل من شغل دى غابة
لكن ضمانك ايه لو تلقى
شيطانك مش واخد اجازة؟
اخد عقلك ونزل هناك
يقطع سؤال سبب بلاك
يفتح ببان للتفكير
يفتح ببان لحاجات كتير
تقلق منامك
ومنام كتير جواك؟؟

(6)
قرب كمان
يا ضيف ومستنيه زمان
كل الكلام مانقال هنفهم
طول ما الحروف فينا بترسم...
مشوار حياة
يبقى اللسان فينا هيقسم :
السر هنا كان منتهاه
* وتبقى شاطر لو تنزعه
من جوه قبره تطلعه
ان كان بعربى ولا ايه
سيريانى حتى ليك فيه
** مفتاحه حرف ورصعه

(7)
فى الموت ..
فى النوم..
إشارة
كود شفرة وليه امارة
مبعوت لينا من عنده
يمكن نفهم ف عبارة....
ساعات نلقط الكود,,
ساعات كتير بيفوت
معنى يعيش او يموت
انتا وكللك شطارة
16/9/2008 2.30 م