دعوة لعمل نيولوك

مضمض بقك م الكلمات
إمسح قلمك م الاوراق
فتّح عينك
بص شمالك...بص يمينك
حد لكمة يكون محتاج؟
إنتا وبس



29/10/2007___12.30م

زهد اللسان

زهد اللسان كلام الحال
اصل اللى انقال
خلاص ...انقال
هتفرق إيه؟
فضفضة؟
على أرض فضا؟
ده حتى نوع م الخيال

يعنى

والسكوت ف حالات كتير..
يبقاله نتيجة وليه تأثير
إختارها صح لحظه سكوتك:ذ
لما تزهق م التغيير
أو تفهم بالمحسوس معناه
أو تترمى بدبش كبير
هتفهم معنى كبير ومهم:
معنى ان الكون له إله
وإنتا هتعمل فيها كبير؟؟

سيب كووووول حاجه
خليك هلهلى
إوعى تفهم..أخرتها جنون
وبئس المصير
ساعتها إسكت
أيوة إسكت
لما تلاقى الجهل أمير

سلام يا صاحبى

بتسال يا صحبى أخبارى إيه؟
هو انتا جنبى من قد إيه؟
سؤال وجه متأخر اوى
عرفنى معنى صداقتنا إيه...
مجرد تعود
مجرد زمان
مجرد مكان بنقعد فيه
موش هتفرق
لو غبت عنك
وأهو على رأيك
الكل فيه الى مكفيه
وتقوللى فينك
الغيبه ليه؟
قلت انت ندل...وندل كبير
حتى السؤال بخلت بيه
رديت عليا: مين اللى يسال؟
قلت : انتا
صاحبك مشاكل بتناديه
قلت: لاء ,انت اللى تسأل
عايزنى اسأل,
انا مليش فيه
دنا اللى زعلت
قلت مين حقه يزعل؟
اللى بيسأل ولا
اللى ماإتسأل فيه؟
انا قلت طيب...
وإفتكرت لما ياما سالت عليه
قلت عادى...طبع البشر
كل وسخ........هتلاقيه

29/10/2007

بكلم الصبر

تقدر تقوللى فاضللى ايه غيرك يا صبر ؟
مبقتش قادر
وبقى فيا الم وكسر
لكن بقول اصبر ياواد
اصبر ياعم...
لسه بقيلك حبة عمر

ضيف عيد الميلاد

قالو زمان : الطبع يغلب التطبع
وقالو النهاردة:
الطبع ممكن يتطبع


كل سنة وانتا طيب
يا جرح نافد
ف قلب ميت
ياصديق عداوة
كانت غشاوة
لما احاربك
وانتا ف قلبى دايما قريب
اكيد بتسال جراله ايه
نبرة عذابه صفيت بايه؟
دى تريقة
ولا عرف حد يطيب؟
لكن هاقولك:
طفيت شموع سنين
لاجل ما تفوت سنين
بصيت شمال ويمين
مالقيتش معزومين
إلا جرحى وقلبى,
وسنين متجمعين,
انا قلت دول بجد
اصحاب مستوفيين
كل شروط العشرة
وليا مخلصين
وأقوللك كلمة بجد:
ف الاول كنت صعب
سقتنى الم وانين
لكن بمر الوقت
لقيت وجودك صح
وانا م الغلطانين
إزاى انا قلت ميت
وانا عشت بيك سنين؟؟؟

عادى يعنى

غابت ليليا
راح اللى كان ليا
يعنى افضل لوحدى
حكم و مكتوب عليا
طيب
راح تفرق إيه؟!!
طول عمره قلبى صاحبى
ما شفتش غيره حضن
ولا مدّة إيد من حد
ولا حد خاف عليا

و الليل لمّا طال
والمركبة من غير طريق
كف على خد مال
ونظرة بصت على البعيد
ونفس قالت ياصبر فينك
اّدم غرق ف حزن غميق

(1)
عد .2..4..8..20
.ناس كتير بتعدى ناس

(2) .
وناس كتير بتظلم ناس
وناس موش ناس
3
والدنيا زوارقها كتير
الظلم زاد عن حد الامن
والكون م الظلم جاله عقم
ودعوة المظلوم ماتحيد
ودعوة تانية لناس مكبوته
نفسها تقول توتة توتة
وحدوتتهم م الكون تغيب
بيقولوا أصل
الاخرة احسن
مفيش تعب
ولايوم قلق
ولا دنيا تفتن
ولا كبر عبيد

عشان كللك ذوق

عشان كللك ذوق
ومليان ادب وطبعك خجل
(منك باتخنق)
خد على دماغك
من غير سبب
أيوة من غير سبب
لما اشوفك بحس بقلق
سبحان الله
ياأخى باكرهك
عامل نفسك مثقف
وقارى ياما كتب
وانا اخرى رواية جنس
ابو ام شكلك عرص
انا منك بأكتئب
وشكلك إبن ناس
انا احسن منك برضه
ساكن أحسن منك
فلوسى أكتر منك
باكل أحسن منك
وما نيش زيك عقد
عايش احسن منك
أعرف بنات بالهبل
وعملت كل غلط
واصل عنك
محبوب عنك
ودا إكمنك :
قفل وموش لبط
إستنى شوية معايا
هاتقول يادنيا كفاية
وفيك هاكرّهك
لوقلت كلمة ف يوم
هالغوش عليها
وهاضحك بيها
وكمان هاسفهك
عارف أمريكا؟
هاعمل زيها
هافرض حياتى عليك
وإنتا هامّشك
انا برضه إبن ناس...
وادينى هانصحك:
شوفلك مكان تانى
شغل تانى
بيت تانى
شارع تانى
كون تانى
انا زيى ناس كتير
ف الدنيا هانخنقك
1/08/2007