الخميس، 3 يناير، 2008

وبحب


وبحب السفر وكانه عشق
متقولش ليا معنديش حق
اصل ف حركتى
كتير راحتى
بدل ما اطق

بحب واعشق ف السما
وارفع عيونى كتير ليها
مبطقش عينى تكون ع الارض
يكفى اللى شايفه كتير فيها
هما يدوبك....ف السما
طيور والوان مولوده بيها
**** مرة سالت سؤال لنفسى
الارض والسما ورمل..وبحر,
تيمة واحدة
حد يوم قال موش مشتهيها؟؟
لكن عمار الارض ومبانيها,
البرج ولا المول ولا المصنع
تسجن عيون تبص ليها
اتخيل لو السما....
هتقول يالهوى
لكن...هبص لما بعديها

وبحب كل صغير
لسّاه ماتلونش
انسان او حتى اخضر
ماددام ماكبرش
ماهو لما يكبر بيبقى.....
ولا احسن ما اقولش
( بالذات البنى ادم)

وبحب دايما احلم بالليل او بالصبح
اصل الحلم عدو
لمفيش فايدة ومعلهش
وده اللى باقى بجد

احلم بالليل باماكن
واتفرج على كام وش


ولو الجهل غلب:
بحلم واقول ياريت
ويا...ريت اخت معلش

معلش بقى...
الجهل مايتغلبش
(بالذات عندنا)
وبحب اشوف ناس
بيوت وشوارع زحمة
والحلم قالوله هيش
بدل الحلم نفكر
فى الجنس ولا الكورة
او اكل ولا لبس
وكده تعظيم سلام


وبحب استعرض حزنى
واقول اخرتها ايه
بعدها بشويه اغنى
واقوله يا حزن:
بس
وبحب دايما انسى
ياهينى على دى نعمة
بير وبارمى فيه,
الظلم والخيانة ونفوس رخيصة جبانة
وحلم موش لاقيه

ليست هناك تعليقات: